中環出更：李家仁美酒會俯首救美
著名兒科醫生「小明」李家仁，除咗兒歌唱得叻，原來飲紅酒都好有心得。由法國威登家族（Louis Vuitton）第五代後人創立嘅餐酒品牌XLV，準備喺香港及內地市場大展拳腳，尋日喺灣仔會展舉行嘅香港國際美酒展之中宣布成立美酒會，實行以酒會友，李家仁就係呢個會嘅首批榮譽會員之一。就喺呢個美酒會嘅成立儀式上，李家仁上演咗一場英雄救美。
話說美酒會儀式發生咗小意外，由於一眾嘉賓要擠迫於狹窄嘅場地影大合照，夾喺一眾美女之間嘅李家仁，佢手中支限量版紅酒突然由盒中脫落，跌落地面打瀉晒之餘，玻璃碎片更擊傷身旁o靚模鍾蕙芝（Lavina）嘅玉腿。雖然當時李醫生已經飲咗幾啖「黃湯」落肚，但係都反應迅速，立即俯首為伊人療傷，在場人士都對李家仁嘅仁醫表現大為讚賞。
今次李家仁跌爛咗獲贈嘅紅酒係XLV嘅Pauillac2007，不但係呢個品牌嘅王牌產品，據聞仲係限量版添，真係有錢都未必買得到。如此彌足珍貴，李家仁卻不表可惜，佢最關心反而係Lavina嘅傷勢。雖然只係皮外傷，但係佢都叮囑對方要好好護理以免留下傷疤，真係憐香惜玉。事後李家仁對卓妮話，佢飲酒唔在乎平貴，亦唔介意係咪名牌，只要飲落順喉，唔會咁快酒精上頭，就算係好酒喎。
7歲開始嘗杯中物
李家仁透露，自七歲品嘗第一口雞蛋白蘭地開始，品酒經驗算豐富，但係都以輕嘗淺酌為原則，謝絕豪飲以免傷身。對於坊間嘅不醉秘方，如飲酒前先食牛油或飲汽水打底，佢話呢啲做法係減慢身體對酒精嘅吸收，論效果唔及麵包，而佢就係食咗麵包先至嚟美酒會品嘗佳釀，難怪李醫生有咁清晰嘅頭腦去應付突發事件喇。
卓妮