填海填海又話填海，功夫茶真係好想知道官場中人腦部結構究竟乜嘢化學成分，因乜事幹餐餐都要打個海嘅主意？移山填海邊有咁容易吖，盞唔衰攞嚟衰啫！
發展局局長陳茂波話喎，位於荃灣區嘅深井填海計劃已於○三年完成研究，基於當時嘅房屋需求，政府冇推行深井填海計劃。不過咁，陳局長話由於近年香港出現土地供不應求嘅情況，為咗拓展土地供應，去年展開《優化土地計劃策略：維港以外填海及發展岩洞研究》，並且展開第一階段公眾參與活動。簡單咁講，官老爺以冇地起樓為名，密謀無中生有填海造地。
唉，呢一班人頭官腦來來去去都係獨沽一味，一話冇地就要填海。莫講話深井居民唔肯過你啦，環保人士同樣耍手擰頭。即使撇開無敵海景慘變屏風樓景唔講，填海造地興建房屋真係行得通咩？
首先，填海要幾耐時間呢？至少十年八載啦，遠水救近火喎，非常費時失事。
其次，你知家陣特區政府氣勢幾弱o架啦，推出任何政策都好似投入扑傻瓜遊戲咁，頭頭碰着黑。推出國民教育咩，一嘢扑低你個大傻瓜；發展新界東北咩，一嘢扑低你個大傻瓜；其他政策例如長者津貼即使未扑低，反對派阻人前進已經頭痕啦。如果茂波局長推出填海計劃，功夫茶相信又會掀起另一場沒完沒了嘅拉鋸戰。
最重要嘅一點仲係，喂，香港唔係完全缺乏土地喎，只不過官僚主義麻痹大意，冇地盡其利咁解。既然有地可用，唔該縮開祿山之爪唔好騷擾個海！
嗱嗱嗱，香港有地可用唔係吹水唔抹嘴o架。大家向北面望一望，唔係北望神州，而係北望邊境。半年前開放嘅邊境禁區總共有二千公頃土地，只要善加利用好好籌謀，興建幾多房屋都得啦。備受爭議嘅新界東北發展區都係講緊八百公頃土地咋，可想而知邊境土地有幾大。
如果你話邊境山長水遠難以安居樂業，好，交通方便嘅市區又點睇呢？政府物業至少有三個宿舍長期丟空，包括西營盤已婚警察宿舍、觀塘房署職員宿舍以及黃大仙房署職員宿舍，荒廢時間最短係三年，最長係十二年。呢三個宿舍若然改建住宅，估計樓面面積八十萬平方呎，足夠幾千人居住。唔好唔記得，宿舍荒廢只係冰山一角，其他投閒置散嘅有用地皮如無意外遍布港九新界。
所以咯喎，茂波局長麻煩閣下扑一扑自己個腦，避免腦部結構嘅化學成分左黐右黐，扑醒自己之後再去睇清睇楚有冇本末倒置。地未盡其利就走去亂咁填海，唔通海龍王同你有仇咩！