泛民主派同部分建制派要求長者生活津貼免資產審查，又要求推行全民退休保障。財政司司長曾俊華尋日出席一個有關經濟自由度嘅研討會時，就以希臘債務危機為例子，強調所有福利政策都必須喺財政上能夠負擔，一旦過度支出，會令社會不穩。佢又預告明年二月公布嘅新政府首份預算案，將維持審慎理財、量入為出嘅原則，睇嚟市民都唔好對佢大幅派糖紓困有太大期望。
