本身為行政會議非官守議員召集人嘅平等機會委員會主席林煥光，喺平機會任內表現廣受好評，佢嘅任期仲有三個月左右，合約期屆滿就絕對唔會續任，話會留喺行政會議服務公眾。佢尋日總結話，任內爭取無障礙通道有進展，但就遺憾政府對少數族裔教育無積極回應。
特首梁振英上場後，迅速回應一眾公屋居民嘅訴求，盡快為一啲舊式或者起喺山邊嘅公共屋邨興建自動升降台，方便居於上址嘅長者同行動不便人士出入，等佢哋多啲融入社區，身體同心理都健康得多。林煥光尋日認同，政府改善無障礙通道確實下過苦功，算係有進展咁啦。
除咗無障礙通道，林煥光平機會任內都積極爭取改善少數族裔學生嘅入學情況，平機會去年發表報告書，批評教育局融合教育失敗，又向教育局提出九項建議，改善非華語學生嘅中文能力。平機會為少數族裔爭取權益，已經非一朝一夕，問題遲遲未有改善，擺明就係前朝政府懶懶閒啦。