政情：陳嘉華一床藥嚇壞哪吒
社交網站嘅影響力真係大，一句話一張相都可以引起好大回響。尋日有讀者爆料，懷疑豪華飲食集團太子爺陳嘉華（Jeffrey）為情自殺，話說佢日前喺社交網站貼出一張有大量藥丸散滿一床嘅相片，西貢區議員方國珊（哪吒）睇見張相，即時打電話畀佢又打唔通，嚇到差啲報警。Jeffrey知道自己「玩大咗」，急急澄清自己尚在人間，叫大家唔使擔心，並速速移除張相。
我哋尋日致電Jeffrey了解件事，佢話自己的確有食藥，但只係普通止痛藥，原來佢近日左邊大腿好痛，經中醫診斷患上痛風，可能近日太多應酬飲酒所致，於是食止痛藥，但冇諗過大家以為佢做傻事。至於哪吒打畀佢時，咁啱電話冇晒電。佢坦言近日因失戀影響心情，但以佢樂觀開朗嘅性格，點會為情自殺！Jeffrey以後真係要小心啲喇，倒晒啲藥丸出嚟影相有乜咁特別呢？
