根據聖經記載，耶穌長大後喺約旦河受洗，而且喺呢度幫佢嘅門徒洗禮。所以，條河被稱為世界上最神聖嘅河流之一。本身係基督徒嘅工黨立法會議員李卓人上星期去約旦出席國際職工會聯盟全球執委會嘅時候，唔覺意浸到呢啲神聖嘅河水，佢仲話有如受洗，不枉此行添。不過，佢上載到社交網站嘅相片顯示啲河水只浸得半個人，又冇牧師或傳道人在旁，似乎似喺度沖緊涼多過受洗喎。
話說李卓人上星期以國際職工會聯盟全球執委嘅身份，去約旦開國際職工盟一年一度嘅大會。喺最後一日，佢去咗約旦同以色列交界參觀約旦河。嗰度嘅氣氛長期緊張，約旦嘅士兵事前已經講明，唔好向以色列揮手，否則有可能即時被槍斃，所以大家都小心翼翼。點知阿人睇睇吓條河，一唔為意就失足跌咗落水，搞到全身濕晒。佢尋日喺自己個社交網站專頁度仲分享咗張相，仲話自己跌落約旦河有如受洗，今次不枉此行。好彩唔係一失足成千古恨啫。