政情：行會三議員 南海一家親
香港好多政界名人都係廣東南海人，原來三位身兼行政會議成員嘅立法會議員葉劉淑儀、林健鋒（Jeffrey）同李慧琼（Starry）都係南海鄉里，尋日佢哋就特登約埋喺立法會大樓影相留念，話要將張相，寄返去畀南海鄉親咁話喎。
葉太、Jeffrey同Starry唔止約埋影相，兩位女士仲夾埋一齊着紫色衫，Jeffrey就戴咗條紫色呔襯番兩位女士。至於點解揀紫色，一向貪靚嘅葉太就話：「立法會啲櫈已經係黑色，唔想成日全黑，紅色又通常喜慶日子先會着，紫色幾好吖，好多人都鍾意呀！」睇嚟葉太好鍾意紫色，因為佢連眼影都係紫色嘅。
葉太又話，唔知係咪因為風水問題，南海人好多都從政，香港唔少前高官都係南海人，包括葉澍堃、梁愛詩、已故嘅黃星華等。Jeffrey就話，佢南海鄉下依家興建緊一個南海會館記載南海歷史，唔知呢班南海政界人士嘅功過會唔會都被記載入內呢？