政情：馬會踼開神童志
港交所前行政總裁鄺其志（神童志）去年被傳與華人置業副主席劉鳴煒喺馬會泳池「爭執」，有傳神童志撳咗劉鳴煒個頭落水，馬會收到投訴後裁定神童志行為不檢，仲喺馬會張貼通告，暫停神童志遴選會員及會籍一年。事件最近有新發展，神童志最矜貴嘅「遴選會員」資格終於都被馬會褫奪，就算明年馬會願意恢復佢嘅會員資格，都只係一個普通會員。
其實件事都發生咗一段時間，而神童志亦潛咗水好耐，從來都未回應過呢單嘢，令呢件事更添神秘色彩，究竟佢係咪真係撳低過劉鳴煒個頭落水呢？因乜事要撳人個頭落水呢？到依家仲係一個謎。我哋打過電話畀神童志問佢呢件事，但佢就話無興趣回應喎，睇嚟佢都唔想再重提此事。
馬會對一般市民嚟講當然係博彩嘅地方啦，但對政經界人士嚟講，馬會就係上流社會嘅社交場所，擁有馬會會籍更加係身份象徵。所以神童志畀人凍結會籍一年已經好慘，因為上流社會人士最鍾意去馬會食飯、飲酒、傾密偈，如果冇得去會所，同上流社會交流都少咗。
不過，最慘都係連遴選會員呢個資格都被馬會褫奪，我哋喺馬會網頁搵到十一月份最新嘅遴選會員名單，發現上面已經冇咗神童志個名，即係話佢現階段暫時「裸退」馬會。據了解，就算明年初神童志嘅會籍禁制期結束，仍然要經馬會大董投票通過，先至可以恢復會籍。
矜貴資格 擁入會提名權
其實遴選會員資格比馬會會員資格犀利好多，因為全港嘅馬會會員有萬幾人，但遴選會員就得二百個左右，而且做馬會會員先要有申請表，但申請表唔係三姑六婆都攞到，要遴選會員或者馬會董事先至有。攞到表格後又要有一名大董或遴選會員提名，再加一名遴選會員附議至得。由此可見遴選會員可以有份決定邊個入馬會，邊個唔畀入。不過，神童志又唔使擔心嘅，冇得去馬會玩，咪去其他會所囉，都係去游水啫。