中環出更：「心蓮心基金」助建青年宿舍
由城中善心名太組成嘅「心蓮心基金」，早前捐出一百萬元幫助播道兒童之家興建青年宿舍，中心前日正式開幕，Adler珠寶董事總經理何彭慧嫻（Patti）、醬油世家新抱Mahnaz Lee及印度富商夏利里拉家族成員Shirley Hiranand等，齊心共襄善舉。
今年五月落成嘅青年宿舍，專為來自破碎家庭嘅十八歲以上青年而設，最多可提供廿四個宿位。身為虔誠基督徒嘅Patti話，雖然宿位唔算多，但總算係個好開始。佢慨嘆唔少年滿十八歲嘅兒童之家院友，夠年齡後就要離開，卻因為種種原因無法與家人團聚，惟有「蝸居」深水埗劏房，過着半工讀日子，生活捉襟見肘。
望將來增加宿位
開幕禮上，一位十九歲女宿友現身說法，坦言未搬入新宿舍前，因為無法支付昂貴租金，一年搬十次屋。景況淒涼，Mahnaz同Patti聽見，都忍唔住眼濕濕。Mahnaz話，期望為宿舍籌得更多善款，將來擴建宿位，等更多無家可歸嘅後生仔女，有個溫暖嘅家。
卓妮