中環出更：「40+典範」嘉許傑出名人
人生超過四十歲，都可以活得健康燦爛，40+協會前晚就頒發「40+典範」獎項畀八位逾四十歲嘅社會傑出人士，包括大家樂集團主席陳裕光（Michael）、九龍表行董事總經理黃錦成、中華基金會主席方劉小梅（Helen）、香港中樂團指揮及音樂總監閻惠昌、復康力量會長林章偉（Leo）等。
啱啱步入六十歲耳順之年嘅Michael，唔止個樣keep得好，仲好跟得上潮流玩WhatsApp，將個人狀況寫上座右銘「燃點自己，照亮他人」。Michael明年三月抱孫，佢大爆囡囡陳浩寧（Candice）知道懷孕後，冇直接報喜，反送上書籍《How to Be A Good Grandparent》，Michael一睇書名即時笑逐顏開。
講起抱孫，黃錦成都就嚟做爺爺，佢公子黃雅倫（Alan）太太懷龍鳳胎五個月，黃錦成笑言老婆心急到依家已經動手煲薑醋。Alan現時喺美國擔任大型IT公司高層，雖然父子分隔兩地，但感情依然要好，佢話有時Alan會打長途電話畀佢傾訴工作煩惱，佢就會過番幾招畀囝囝，嚟緊聖誕佢兩公婆會赴美享天倫。
方劉小梅感激老公支持
Helen喜獲殊榮，佢話呢個獎對佢來講係「暮鼓晨鐘」，好感激老公方杰一直默默支持佢。Helen熱心公益，全因受父母嘅善心耳濡目染，依家佢仲推動子女行善，早前細仔方仁宗就跟佢去咗貴州扶貧。其他獲獎人士仲有恩榮金融董事謝國安、自在社創辦人周華山、凱達環球執行董事施家殷。
卓妮