成語故事掩耳盜鈴大家應該聽過啦，知唔知呢個古仔有一個現代變奏版？情節話簡單又唔算簡單，話複雜亦唔算複雜。
現代變奏版嘅掩耳盜鈴係咁嘅，從前喎，香港有好多窮人，於是政府成立扶貧委員會，企圖為窮人解決問題。後來喎，曾蔭權吹住口哨上台做特首，覺得香港其實冇乜窮人吖，而且人人有瓦遮頭，所以下令解散扶貧委員會。亦即係話，煲呔曾就好似一個笨賊咁，塞住對耳就以為乜事都冇，蒙住對眼就以為貧窮現象不再存在，所以曾氏語癌金句其中之一係「香港人想窮都難」。
改朝換代之後，當今特首梁振英比較願意面對現實，未正式上任已經宣布成立籌備小組，重新設立扶貧委員會，由政務司司長林鄭月娥擔大旗出任主席。
既然扶貧委員會鹹魚翻生，新一屆立法會當然亦有必要成立扶貧小組委員會，以便同政府對口。立法會扶貧小組委員會前日舉行第一次會議，你估議員嘅話題係乜嘢吖嗱？冇錯嘞，梗係大翻前朝爛帳啦，群起炮轟曾蔭權漠視貧窮問題。身兼行政會議成員嘅新民黨主席葉劉淑儀批評，上屆政府所講嘅貧窮線，只係貪曾喺立法會順口噏，話拎綜援嗰啲就叫做貧窮。另外又有議員炮轟，上屆政府未解決貧窮問題就取消扶貧委員會係非常錯誤嘅決定，希望唔好學似當年一樣「高大空」，必須落實具體嘅貧窮線指標。
唉，所以話貪曾禍港確係路人皆見，明明香港有過百萬窮苦大眾，只顧自己貪威識食嘅曾爵士居然視而不見。或者咁講啦，蔭權七年根本係蒙眼治港，香港唔陸沉已經偷笑。
好嘞，如果真係要扶貧，應該點做呢？不如聽聽德勤稅務主管合夥人羅盛慕嫻嘅意見，佢話推出一次性紓困措施對政府嘅負擔較小，如果減稅，日後再加稅就影響深遠。
其實計功夫茶話齋，推出一次性紓困措施只係聊勝於無，長遠而言係要協助草根階層斬斷窮根。勞工及福利局局長張建宗都話啦，扶貧委員會唔會側重個別措施，避免派糖式扶貧，會喺政策層面推動扶貧。張局長又認為，訂出貧窮線有助制訂政策方向及量度扶貧計劃成效。
講到尾，現屆政府肯面對貧窮問題已經算得上知恥近乎勇，家陣少咗一個利己不利人嘅貪曾阻頭阻勢，扶貧工作應該有機會展開啩。唔好唔記得，百萬窮人百萬票，二○一七年假如兌現阿爺許下嘅承諾，真係落實一人一票選特首，邊個扶貧成功邊個就係票王。從呢個角度出發，五年後想做特首咩？出盡九牛二虎之力扶貧啦！