政情：反長津贏人氣 嫻姐收照妖鏡
港大民意研究計劃尋日公布「十大立法會議員排名」，其中重返立法會嘅工聯會超級區議員陳婉嫻，就以企硬反對政府寸步不讓嘅長者生活津貼（長津）計劃，成功贏得人氣，以五十六點九分，一吐做唔成票后嘅烏氣，榮登市民最熟悉嘅議員，但登上寶座之路可謂一將功成萬骨枯。
究竟工聯會將會投票反對長津撥款，定係離場抗議曲線支持政府？到依家仲係未知之數，但工聯會內部不滿嫻姐同政府硬碰硬嘅態度就係公開嘅秘密，嫻姐企硬之時又將「好多壓力」掛在嘴邊，似係揮手求救？
尋日左翼廿一、社民連同幾個大專組織一班要求政府推出全民退保嘅後生仔唔知係咪感受到嫻姐召喚，一行十人去工聯會總部繼續佢哋嘅「黑頭人撐白頭人」第二波行動。佢哋拎咗支拐杖去工聯會，希望工聯會企硬立場唔好跪低，仲送埋一面照妖鏡畀嫻姐，話要照晒工聯會啲牛鬼蛇神出來，免得工聯會受到妖氣所侵，手腦唔協調跪低喎。