政情：譚惠珠現身廉署懶神秘
行政會議成員林奮強自獲批無限期休假後，一直無再公開露面，記者連日來喺佢寓所同北角廉政公署總部外守候，都見唔到佢現身，反而尋日就等到基本法委員會委員兼港區人大代表譚惠珠喺廉署總部出現，不過佢強調自己到廉署與任何案件都無關，叫大家唔好胡亂揣測。
尋日上午十一點左右，珠姐一個人行入去廉署總部。記者問佢嚟做乜，佢就立即笑晒口咁澄清話，今次到訪廉署與任何案件都無關，只係同朋友食飯。再問佢同乜嘢朋友食飯，佢就懶神秘咁回應話：「我喺呢度有好多朋友o架！」
翻查資料，譚惠珠身兼廉政公署審查貪污舉報諮詢委員會同廉署保護證人覆檢委員會小組成員，到廉署總部同朋友食飯確實唔出奇。