由七位立法會議員組成嘅經濟民生聯盟（經民聯），由於未有聯合辦事處，佢哋啲職員一直好似游牧民族咁，要喺唔同嘅議員辦事處工作，但最近經民聯終於部署好基地喇。經民聯嘅銀彈實力真係唔講得笑，一租就租正喺立法會隔籬嘅海富中心，聽聞佢哋租咗中層過千呎單位，呎租近五十元，每月租金最少要五萬元。
經民聯副主席張華峰尋日話，經民聯成立咗差唔多一個月，最近已經喺海富中心租咗個單位做總部，方便大家一齊做嘢，行條天橋就到立法會。
據聞經民聯出手闊綽，呢個過千呎單位，月租最少五萬多元。經民聯主席梁君彥就話，單位呎價都算合理，但究竟係幾多錢，佢就懶神秘唔肯講。
相對泛民主派就冇咁富貴喇，好似「丐幫」社民連咁，會址已經喺太子咁遠，依家仲因為租金由一萬三千元加到一萬七千元，於是焗住要搬去再遠啲嘅荔枝角，社民連執委黃浩銘講笑話，新會址唯一好處係近荔枝角收押所喎。