政情：工商專聯 要做最TOP智囊
智經研究中心（智經）一向被視為「貪曾」曾蔭權嘅御用智囊，過去提出嘅建議都被高度重視，早前特首選舉期間，智經更一度成為唐營嘅後援會。不過，特首梁振英（CY）上台後，政圈各智庫重回起跑線競爭，巧合此時傳出香港工商專業聯會（工商專聯）有意由低調實幹變得更走出前台，睇嚟有意同智經分一杯羹，爭奪政府嘅重要智囊地位。
「曾去梁上」原本以為淨係對政界各方勢力平衡有「洗牌」作用，原來對做政策研究嘅智庫亦係一樣。擁有前朝及唐營色彩嘅智經，做咗五年主席嘅胡定旭任期屆滿，隨即換上馬會大董李國棟，雖然李國棟並非「梁粉」，但換走被譽為唐營核心人物嘅肥胡，咁就意義重大喇。就喺呢個時候，工商專聯亦開始蠢蠢欲動。
改風格轉趨高調
消息指，工商專聯過去一直就社會各項議題進行研究，包括早於○八年撰寫逆按揭研究報告，○九年探討貧窮住戶問題，研究具前瞻性，但奈何未受當時政府重視，事隔多年後先被採用或重提上議事日程。據聞佢哋內部深感過去太低調，所以有意日後轉趨高調增加影響力，包括稍後向當局反映對施政報告嘅意見後，隨即召開記者會，另外對政改問題、標準工時立法等敏感議題亦唔會迴避，希望提出切實可行建議。
除咗外在因素外，工商專聯想轉趨高調亦同內部因素有關。今年初開始出任主席嘅前廠商會會長黃友嘉，素來公職多多並與政府關係良好，有助工商專聯「升呢」，而且工商專聯內有「梁粉」身影，包括前CY競選辦副主任何永謙等，對支持CY依法施政都有一定期許，增加影響力嘅諗法亦合情合理。
話時話，智庫組織喺香港發展仍屬初級階段，唔似得外國可以成為政府或執政黨嘅重要智囊，無論係工商專聯又好，智經又好，如果可以各顯神通，百花齊放提出更多具前瞻性嘅建議，相信提出「香港營」概念嘅CY，都會摒除門戶之見樂意採納。