中環出更：姚珏音樂之路不平坦
好多音樂家都有一條成名辛酸路，著名中國女小提琴家姚珏，都捱過唔少苦頭。佢自爆當年十六歲留學美國時，生活費有限，四隻雞翼分兩餐食；為慳一蚊車費，捱餓徒步數公里路返學，嘗盡苦頭。姚珏如今一曲值千金，正因為成功路上非僥倖，所以成名不忘公益，嚟緊十二月一日將為仁愛堂舉行慈善音樂會。
姚珏尋日介紹慈善音樂會之餘，仲笑談音樂之路，原來佢小時候唔鍾意學琴，每次都要姚爸爸逼佢返學，估唔到學出癮來，從此琴不離手。不過，當年隻身留學美國，並非一帆風順。姚珏坦言，當時身上只有四十五元美金（約三百五十港元），過住三餐不飽嘅窮日子，但佢無放棄追尋夢想，咬緊牙關過日子。
成功秘訣 盡早上台表演
苦學成才嘅姚珏，不忘傳授成功秘訣，提醒家長盡早畀子女上台表演，增強自信。佢話，成就感會鼓勵學生定下遠大目標，努力學琴。至於佢自己，懷孕時已胎教，得閒就拉琴畀ＢＢ聽，耳濡目染下，細女音樂感十足，從小拉得一手好琴。