中環出更：夏利萊90大壽 500萬捐科大
本地印度裔望族夏利里拉家族向來熱心公益，其掌門人夏利萊博士（Hari Harilela）對於教育嘅捐助更係不遺餘力。適逢今年係夏利萊嘅九十歲大壽，尋日佢就好慷慨咁捐贈五百萬元予科技大學，成立夏利萊伉儷冠名嘅教授席，以支持表現優秀嘅副教授或助理教授追求科研成果。
學生着民族服唱生日歌
其實夏利萊並非首次捐款畀科大，據科大校長陳繁昌透露，夏利萊曾經捐建演講廳及設立獎學金。佢之所以鍾情科大，皆因篤信風水嘅佢認為科大風水甚佳。但夏利萊覺得風水之道並唔複雜，其實只要順風順水，感覺舒適就得喇。佢話十多年前首次踏足科大，就有呢種良好感覺，而科大喺短短十多年就爭取到亞洲第一排名，同山明水秀嘅優雅環境不無關係。
科大為咗答謝夏利萊，不但致送生日蛋糕，仲特別安排不同國籍嘅學生，穿上代表自己國家嘅民族服裝高唱生日歌；佢嘅生日願望係科大能夠攀上世界一流學府之列。夏利萊話，做善事係唔計較種族，可以幫助嘅都略盡綿力。佢憶述上世紀嘅石硤尾大火，曾答應捐出五千元援濟災民，後來發現自己嘅財力不足應付，就算向銀行借錢都要完成捐款承諾。
出席捐款儀式嘅嘉賓，仲有鐘錶大王孫秉樞同製衣大王陳瑞球呢兩位老朋友，而夏利萊嘅親友亦濟濟一堂。兒孫滿堂嘅夏利萊話，現有六十五位家人同住於九龍塘大宅內，佢話家庭和洽比世上一切都來得重要，而和洽相處之道就係唔干預家人嘅活動，以及尊重家人私隱。
卓妮