行政機關舉步維艱，任何政策唔理好醜，一出台照例招惹歇斯底里嘅反對聲音，到底係乜嘢原因呢？根據行政會議召集人林煥光嘅講法，部分反對聲音已經去到「上綱上線」、「強政府所難」、「對人唔對事」以及「政治抽水」嘅程度，反對者好可能係為咗「一黨私利」。
林煥光嘅講法當然有一定道理，結黨營私古往今來都係人類劣根性之一，否則三尖八角嘅飲食男女都唔會走埋一齊沆瀣一氣，畢竟結黨唔係結婚，傻仔先至同你講心。之不過咁，另外有一個因素絕對唔可以忽視，就係香港議會文化嘅長期陋習，永遠以開天殺價作為談判技巧。
今屆成功躋身立法會嘅新民黨副主席田北辰就話嘞，行政同立法關係最大障礙係討價還價文化，例如立法會討論長者生活津貼，部分政黨要求提高長者資產上限，同政府討價還價猶如街市買菜。煩不勝煩一味講價嘅街市文化係點樣形成嘅呢？田北辰觀察所得，呢個係前朝曾蔭權政府造成嘅難題。
嗱嗱嗱，你都咪話議會新丁冇料到，田北辰真係一針見血o架。立法會搞到成個街市咁，呢個似豬肉佬，嗰個似賣菜婆，一個二個講價講到糾纏不清，真係同貪曾有千絲萬縷嘅關係。煲呔曾就好比一個街市持牌人，冇設立明碼實價嘅交易制度，反而以黑店手法不良經營，任由檔主斬到顧客一頸血。顧客如果唔想淪為待宰羔羊，梗係討價還價啦。
講真吖，貪曾自己都好鍾意討價還價，事關佢最擅長官商勾結。喂，東方報業集團獨家連環揭發佢同富商過從甚密，上天下地黐飲黐食，如果唔係經過討價還價嘅必然程序，又點會得到入住深圳豪華廉租屋嘅機會呢？至於討價還價嘅具體內容，功夫茶暫時就一無所知，麻煩廉署盡快查個水落石出，唔好再死拖爛拖，還公眾一個知情權吖嘛。
田北辰又讚新一屆政府有板有眼，只不過官員推銷欠缺推銷技能。有板有眼四粒字確係可圈可點，睇番上一屆政府嘅胡作非為，不但最大嗰個曾蔭權貪遍海陸空，連第二把交椅嘅政務司司長許仕仁都涉嫌違反防賄條例而被捕，最終廉署正式檢控，大家就知有板有眼係幾咁難能可貴。
問題係，新一屆政府有板有眼可以持續幾耐呢？唔好唔記得，一個問責局長麥齊光涉嫌詐騙而被控，一個行會成員林奮強亦捲入加佣賣樓風波而受查，有板可能撞板，有眼可能眼冤o架咋！
點都好啦，既然貪曾種下禍根阻撓施政，撥亂反正之道在於明碼實價，政府唔好再做黑店喇！