香港早幾年出生率不斷下跌，令上屆政府需要強行殺校，但勢估唔到近年嘅出生率從谷底不斷回升，令幼稚園同小學學位爭崩頭。民政事務局局長政治助理徐英偉（Caspar）都係其中一個受害者，佢細仔依家連幼稚園都未正式入讀，已經要搵定小學，認真誇張。
Caspar最近忙緊幫細仔搵學校。佢細仔依家已經喺一間名牌幼兒園返緊學前遊戲班，如無意外可直升同校嘅幼稚園，但佢仍未心足，同時排緊隊申請入讀另一間名幼稚園。
Caspar預計嚟緊幾年嘅小學學位將會非常搶手，依家諗定邊間小學都差唔多。對於唔少家長都將有冇開辦德育及國民教育科，作揀選學校嘅因素，本身係民建聯黨員、根正苗紅嘅佢就話完全毋須考慮，因為不論學校有冇教，佢都會自行授課，教導子女點樣做個有責任感嘅中國人。