考評局前排出咗首屆中學文憑試考試報告，透露原來考生考中文口試時，有機會因經常將iPhone、facebook掛在口邊而被扣分，令好多考生都紛紛呼冤，事關facebook根本就無官方中文名。而考評局一句facebook中文叫「面書」，就搞到考生們更加摸不着頭腦，因為大家都無諗過，正當考評局叫考生唔好着背心短褲應試嘅同時，原來一個唔經大腦、單照字面、監粗直譯嘅「面書」，竟然可以登上神聖嘅試場！
不過既然考評局如此重視民意，大家梗係要相應配合、乘勝追擊。而下一個經常被人「中英夾雜」嘅莫過於YouTube。YouTube究竟可以點譯？有網民就話照辦煮碗「你（you）管（tube）」可也。不過既然字面直譯可取，按音直譯也無不可，如此一來「乳貼」亦不失為一個選擇。不過網民就嫌「乳貼」通俗，加上考評局話考生唔識文言文，提議譯作「汝貼」，再想文雅啲「爾道」都唔錯o架，仲可滿足晒音、意俱備嘅要求添。唔知邊個可以提供一個標準答案呢？