政情：女童獻花 慘食林鄭檸檬
宣揚環保係特區政府嘅其中一項重要任務，政務司司長林鄭月娥就帶頭做好榜樣，佢尋日為一年一度嘅明愛九龍區賣物會擔任主禮嘉賓時，堅拒接受紀念品，可能大會認為兩手空空唔多好，點都要安排一位小學生向林太獻花，但林太仍然婉拒，佢建議妹妹將紮花轉送畀媽媽。總之就係環保到底。
講開明愛賣物會，林太就大講自己同明愛嘅淵源，佢話自己除咗係天主教徒、細個又喺天主教學校讀書外，之前做過社會福利署署長，所以同明愛有一段深厚感情。現場市民對林太都好好感情，唔少市民見到林太即刻大叫「林太加油呀」、「我哋支持你」。
不過唔知係咪近排太掛住做嘢，林太真係消瘦唔少，佢黃昏出席另一活動時，就叫大家唔使擔心，佢形容自己嘅健康係「從未如此咁Fit」，仲講笑話自己雖然年過四十，但一定有能力繼續貢獻社會。