政情：CY童軍裝 主持大會操
香港童軍總會尋日舉行一年一度童軍大會操，特首梁振英（CY）罕有以一身童軍制服「亮相」主持檢閱。其實歷任特首較少出席大會操，即使官員出席都係以一套老西頂檔，CY今次一絲不苟以制服登場，揮手敬禮仲駕輕就熟添。
不過CY尋日話，佢已經四十年無着過制服，對上一次着嘅係中學校服。尋日烈日當空，CY大汗疊細汗都堅持着制服出場，事關佢係童軍總領袖。CY尋日首次以總領袖身份出席童軍活動，為現場三萬個童軍覆誓，見證佢哋重申宣讀誓詞後仲檢閱各童軍，着上制服嘅CY向步操隊舉手回禮，甚有「總領袖」風範。
CY尋日朝早出席另一個為內地學童籌款活動，就着番佢件橙色Polo競選落區「制服」。CY尋日又喺活動上想當年，重提十幾廿年前，香港人為內地東北山林大火同華東水災熱心賑災嘅場面。為咗說明啲咩？之唔係想提醒吓香港人，關心祖國之情早喺十幾廿年前已植根港人心中囉。