政情：貪曾李漢奸有陰謀？
為禍香港嘅前特首曾蔭權爵士尋日又再喺我哋嘅視線範圍出現，佢同民主黨創黨主席李柱銘同場望彌撒，兩個咁愛搞事嘅人同場，有冇密斟攪局，真係畀人有無限想像空間，實情係點，就真係得佢哋兩個至知嘞。
尋日朝早十點幾，我哋發現載有貪曾同太太曾鮑笑薇嘅政府專車喺港島華仁書院教堂門前停低，着住樽領淺色衫嘅貪曾喺落車前先左望右望，慌死有人仲會留意佢呢位過氣政客，之後就喺保護要人組警員嘅陪同下施施然行入教堂。五分鐘後，身穿黑色西裝同啡色皮鞋嘅李漢奸李柱銘亦都出現，二人「前後腳」走入教堂。
大約一個鐘頭之後，煲呔曾一支公行出教堂，李漢奸亦都喺幾分鐘後緊隨其後離開。佢哋兩個咁刻意分開而行，係咪有不可告人嘅秘密、有無密斟攪局，就真係得佢哋兩個人至知嘞。最近政壇咁熱鬧，又傳聞話有人有組織咁去滋擾現政府，令個政府無一日安寧，兩人有密斟都唔係奇吖。貪曾之後就去咗跑馬地山光道馬會會所，又唔知去見佢邊啲「曾朋友」嘞。
田二少轟貪曾縱壞議員
其實貪曾禍港七年，應做嘅嘢又唔做，香港因為佢在位，累積唔少問題，幾乎搞死香港，佢其中一項「德政」，就係縱壞班議員，等佢哋習慣性以為政府時時都係開天索價，議員唔落地還錢，就係冇做好議員呢份工。新民黨立法會議員田北辰尋日喺電台節目上，大嘆現時行政立法關係之間存有極多絆腳石，當中最大嘅障礙就係討價還價文化，而呢個咁嘅現象係由貪曾一手造成。佢用長者生活津貼做例子，話立法會唔少政黨要求提高資產申報上限嘅做法，明顯就係要同政府討價還價，又明寸呢啲政黨嘅行為就好似喺街市買餸。二少又話啲政黨喺度討價還價嗰陣，根本就無諗過咁做有冇理據，淨係覺得如果唔還價就係傻仔同對唔住選民喎。
唔知係咪咁，所以現屆政府上場首次去財委會要求撥款，就講明長者生活津貼三不：不取消及不調整資產審查上限，同埋不撤銷撥款要求，就係要改去議員嘅「壞習慣」。