中環出更：新舊教育局長碰頭不談教育
馬會年中做唔少善事，吸引大小慈善團體搞盃賽聯誼吓。尋日輪到保良喺沙田馬場搞「保良盃」，養病中嘅前教育局局長孫明揚同現任局長吳克儉都嚟齊。新舊局長碰頭，無傾「拆彈」心得，反而閒話家常，孫明揚話不在其位，當然要靜心退休。
保良盃總理齊撐場
孫公早前去咗加國探舅仔一個月，回港後睇書充實自己，好學不倦。保良搞盃賽，佢同一眾董事局成員齊打氣，副主席鄭錦鐘（Eric）、總理蔡李惠莉、陳正欣、紀寬樂醫生、前主席孟顧迪安等紛紛支持。主席梁寶珠就同千金林玉茵滿場飛招呼賓客。Eric入到馬場不忘帶私伙酒，拎出一支Vieux Chateau Certan 1999宴客，好友大讚酒味香醇，可惜Eric全日小注怡情都係「食白果」。
蔡太就撇低玩具大王老公蔡志明，單拖入場。細女加怡嫁得如意郎君後，佢多咗半個仔，不時食到愛心西餐，大女婿就擅長炮製中菜，一中一西輪流奉上，口福不淺。
香港認真係福地，紐約一個風災，翻轉全市。曾喺紐約讀大學嘅林玉茵馬上致電好友慰問。唔少舊同學屋企停晒電，點住蠟燭過夜，苦中作樂。
卓妮