今時今日，港產荷蘭水蓋愈來愈冇公信力，愈來愈唔值錢，點解？無他嘅，曾蔭權爵士任內公器私用，將勳章當私人禮物大派送，「曾朋友」人人有份，久而久之咯喎，你話畀人知獲頒乜乜物物勳章，都唔係幾馨香嘅咋。
嗱，政府日前宣布褫奪三名因貪腐罪行入獄政商人士嘅勳銜，包括會德豐及九倉前大班兼香港望族何東外孫洪承禧、華人廟宇委員會前委員胡詠紀、前自由黨成員兼前區議員蔣世昌，即日從特區授勳及嘉許名單中除名，係回歸十五年來首次撤勳銜行動。其實，呢三位人士都係煲呔曾任內被判入獄，但貪曾闊佬懶理，從來冇執行既定嘅褫奪勳銜機制，都唔知佢究竟係有心縱容，定係另有目的。
功夫茶唔係亂噏o架，煲呔曾最叻就係公器私用，私相授受嘅嘞，佢未執包袱離開禮賓府前，除咗傍住富豪黐飲黐食，更加利用授勳大玩政治酬庸嘅把戲。舉一個例子吖，「名嘴」鄭經翰一○年獲頒金紫荊星章，大家試諗吓，呢一副日日夜夜靠把口搵食嘅鬧人機器，對香港有乜嘢實質貢獻呢？如果你諗來諗去都諗唔到，不妨諗吓佢嘅花名，鄭經翰又叫「煲呔針」，即係煲呔曾安插嘅一支針，咁你就知道佢點解可以獲頒金紫荊星章嘞啩。
再舉個例子吖，有「三點不露」之稱嘅前金融界立法會議員李國寶，○七年獲頒最高榮譽嘅大紫荊勳章，佢又何德何能呢？喂，人哋當年擔任煲呔曾競選辦公室主任，捱晒義氣又拍晒心口為曾爵士籌款拉票，梗係要投桃報李喇。唔止咁吖，連李國寶兩名兒子李民橋及李民斌亦先後獲委任為太平紳士添，大家無謂再問佢哋年紀輕輕究竟何德何能咯，總而言之，一人得道，雞犬升天，明白冇？
不避瓜田李下嫌疑接受富豪奢華款待嘅貪曾，唔止貪婪到最後一分鐘，而且酬庸到最後一分鐘。就喺佢卸任特首嘅最後一日，即係今年六月三十日，佢公布咗任內最後一份授勳名單，近三百人獲頒勳銜或嘉獎，其中不乏「曾朋友」，包括前律政司司長黃仁龍、商界人士呂志和、前廉政專員湯顯明、前衞生署署長林秉恩等等。嗱嗱嗱，煲呔曾涉嫌貪腐正接受廉署調查，喺咁敏感嘅時候，佢醒個荷蘭水蓋畀廉政專員，究竟有乜嘢企圖先？至於獲頒銀紫荊星章嘅林秉恩，任內更加劣迹斑斑，醜聞不絕，佢執掌嘅衞生署曾多次選擇性檢控東方報業集團，唔通咁就係所謂嘅功勞？
正如歌仔所唱，你阿媽，大減價，益你阿爸。家陣港府授勳同樣係酬賓大減價，可惜唔係益你阿爸，而係益嗰啲同貪曾眉來眼去嘅「曾朋友」，你唔恨得咁多嘅喇。不過咁，新政府撥亂反正，開始清除垃圾，捲入官商勾結醜聞嘅前政務司司長許仕仁又好，或者煲呔曾本人又好，隨時被「搣柴」，唔好高興得太早吖！