政情：鬍鬚曾捉蟲上身好興奮
政務司司長林鄭月娥前日暗批上屆貪曾政府向全民派發六千元，當時負責宣布派錢嘅財政司司長曾俊華（鬍鬚曾）尋日出席「創新科技嘉年華二○一二」開幕禮後，未有回應林鄭有關說法，反而喺致詞時用上特首梁振英（CY）經常掛喺口邊要加強「官產研學」說話，對分內工作認真上心。
鬍鬚曾尋日以實際行動表達對創新科技嘅支持，佢喺不足一小時內參觀咗近十個展覽攤檔，要數最有興趣項目首推狀似毛蟲嘅「爬衣服機械人」。呢個機械人可以喺衣服上爬行，仲可以同人體互動，起初工作人員只係將條蟲放喺鬍鬚曾手臂，點知鬍鬚曾愈玩愈開心，捉咗條蟲上胸口玩，希望佢做事唔好捉蟲就好喇。