政情：啤酒節盡興 陳恒鑌棄駕
民建聯新紮立法會議員陳恒鑌（Ben），本身係新界青年聯會主席，同班新界青聯兄弟姊妹感情勁好，仲不時有聚會添。自從勝選之後，Ben投入議會冇停過，難得前晚立法會財務委員會會議準時散場，佢即時同班老友一齊去參加尖沙咀某酒店舉行嘅德國啤酒節，趁機放鬆吓。
阿Ben話，當選後一路都好忙，前晚難得可以盡興一次，雖然係咁，佢都唔敢忘記自己嘅立法會議員身份，美酒當前亦只係淺嘗即止，絕對冇飲過頭，前車可鑑嘛。佢透露，以往偶爾會同朋友飲吓啤酒，但自己唔係太飲得，加上早知前晚會飲酒，所以特登泊架車喺立法會，寧願搭的士返屋企喎。
除咗阿Ben之外，民記「第一梁粉」、北區區議員劉國勳，佢同老婆呂迪明都有去到啤酒節。劉國勳話，自己平時唔飲酒，但為咗陪老婆，平時唔飲酒都要去應酬吓。