立法會選舉期間，候選人為有效宣傳，派單張嘅情況同「燒樹」冇咩分別，但選舉過後，用剩嘅宣傳單張即變垃圾，又或者回收循環再造。不過，為民建聯超級區議員李慧琼（Starry）助選嘅港島區義工，就用啲棄置月曆卡製作一份好特別嘅手工藝，就係「孔雀慧琼」，而且仲識得開屏添。
Starry尋日喺社交網站上載咗兩張相，分享佢早前出席港島區一個聚會時收到嘅一份特別禮物。禮物係由一位義工親手製作，用咗Starry喺選舉期間派發嘅月曆卡，加埋一啲卡紙，做咗隻可以開屏嘅孔雀，而喺孔雀開屏後每一條羽毛都有Starry個「嘜頭」。
雖然喺隻紙孔雀上見到咁多個Starry確實有啲恐怖，但嗰位義工嘅心思真係毋庸置疑，難怪Starry喺網站上都話：「義工很有心……很喜歡，很感動！」Starry仲同我哋講，除咗隻紙孔雀外，義工仲送咗其他自製嘅孔雀擺設畀佢以示鼓勵喎。