政情：黎棟國太太 賣物會亮鑽戒
一年一度嘅懲教署體育會秋季賣物會，尋日又喺赤柱監獄旁嘅足球場開鑼，依舊義賣囚犯親手製作嘅紀念品做善事。
除咗廉政專員白韞六捧場外，保安局局長黎棟國仲帶埋太太出席及主禮，甚少露面嘅黎太以黑超、黑褲同黑長靴示人，但最搶眼都係佢右手無名指戴住嗰隻閃爍嘅鑽戒，令成個舞獅點睛儀式點綴不少。
大會仲安排入場人士只要捐出一百元做善事，就可以食一餐由囚犯煮嘅監倉飯，出席嘅應屆香港小姐都有試食。不過，黎太就唔得閒食喇，事關佢要孖住老公黎棟國去逛賣物攤位，工作人員用繩畫出半個籃球場咁大嘅範圍畀佢哋逐個攤位慢慢睇。
當兩人行到一個賣太陽眼鏡嘅攤位時，黎太就忍唔住出手，即場幫老公揀咗副型仔黑超，兩公婆一齊做對黑超夫婦，畀錢期間黎太仲晒多次手上隻閃爍鑽戒添！據講今年嘅拍賣成績比去年好，最後籌得超過一百萬元。