政情：中策組兩巨頭落區收風
特首梁振英（CY）將於明年一月發表任內首份施政報告，我哋收到消息，作為CY官方智囊嘅中央政策組，近日不斷邀約各區區議員，了解吓佢哋對地方行政改革嘅意見，講穿咗就係想聽吓大家覺得點樣先可以落實CY「加強地方行政」、「強化區議會角色」嘅競選政綱。據講負責今次「收風」工作嘅人層次甚高，中策組首席顧問邵善波及全職顧問王卓祺兩位重量級智囊親身上陣，莫非施政報告會就「地方行政改革」有所着墨？
邵善波同王卓祺早幾日約咗幾位區議員見面，顧問孖咇出動，當然唔係飲茶灌水咁簡單，兩人集中聽取出席者對改善地方行政，以及強化區議會職能嘅意見。據講兩人聽得多、講得少，聽到精闢意見時仲不時低頭沉思同記低，認真程度前所未見。消息話，兩大智囊之所以咁緊張，全因為CY想喺來年一月嘅施政報告中，向市民交代上述關乎民生同日常生活嘅改革，希望真正可以畀市民感受到「地區問題、地區解決」嘅好處。
CY決心毋庸置疑
有份出席嘅中西區區議員陳財喜話，當日會面一個半小時，席間一眾區議員主要表達咗希望政府將來規劃地區發展時，可以多啲諮詢區議會，上下結合咁去做，先可以清楚了解地區需要。佢話，依家民政事務專員權力唔足夠，其他部門亦唔會聽專員支笛，好多問題好似亂泊單車、電訊商易拉架阻街問題等，因為現行政策僵化，所以遲遲都解決唔到，若要改善情況，政府各區負責統籌嘅部門，以及區議會都要擴權先至得。
有份出席嘅灣仔區區議員伍婉婷亦建議，民政事務專員要有權力統籌其他政府部門，做一啲前線服務，咁先可以有效處理到民生問題喎。另外亦有區議員建議政府下放權力予區議會處理食環及街道清潔等工作。無論點都好，CY改善地方行政制度嘅決心絕對毋庸置疑，有區議員估計，中策組今次落區收風，CY嚟緊一月施政報告好大機會交代地方行政改革問題，到底係真唔係，仲有兩個月就揭盅喇。