中環出更：歐倩美瞓身搞粵劇籌款
年輕一代識得欣賞粵劇嘅人唔係好多，家族做鐘錶生意嘅博愛醫院總理歐倩美（Stella），稱得上係少數年輕嘅資深粵劇迷，事關佢自細就跟住媽媽睇粵劇，哼唱兩句冇難度，係博愛董事局內知名嘅靚聲總理。Stella早前就相約博愛曾耀祥、譚姜美珠及陳李妮三位副主席，密斟十二月底嘅粵劇籌款活動，將至愛嘅文藝活動與慈善互相結合。
Stella話，由粵劇紅伶尹飛燕首次執導及擔綱演出嘅《孝莊皇后》，去年推出後備受戲迷追捧，今年十二月底將喺高山劇場再度與戲迷見面，其中廿三日嘅慈善演出，將為博愛醫院長者夢想成真計劃籌款。Stella全家都係粵劇迷，家姐兼前仁愛堂主席歐靜美更加係尹飛燕首個入室弟子，經常喺慈善演出場合粉墨登場，但係佢就冇正式拜師學藝。
靚聲直逼大歌星
見Stella咁熱心為博愛籌款，三位副主席都拍心口，話要落力搵城中好友去捧場。「美孚舖王」譚姜美珠爆料話，Stella歌喉一流，有次唱卡拉OK時技驚四座，讚佢把靚聲直逼大歌星。