中環出更：《廠商會青委Style》首播high爆
韓星PSY一首《江南Style》火速熱爆全球，韓流直逼香港，香港廠商聯合會一眾青委前晚喺十五周年生日派對上，都跟風玩一轉，數十位青委花個幾月練舞綵排，拍咗輯《廠商會青委Style》，趁晚宴首播。平日官仔骨骨嘅廠商會會長施榮懷（Irons）除低領呔，與前會長黃友嘉及副會長吳永嘉，即場跳番轉騎馬舞，氣氛high爆全場。
梁啟洲自創青委會歌
青委會生日，青委主席顏明潤搞搞新意思，拉埋近四十個青委拍片賀壽，挑戰「江南Style」。副主席劉子芸狂煲網上片段鑽研舞步，拍心口教青委拆解舞步，近四十個青委包括副主席顏明秀、黃浩鈞、羅程剛、前主席蔡志婷等齊齊跟住學，一跳上癮，仲自拍片段成《廠商會青委Style》。咁有創意，段片一播出，尖叫連場，一眾商會高層大叫Encore，紛紛提議將片放上YouTube。
除咗勁舞，前主席梁啟洲更作曲又填詞，自創青委會歌，捉埋大家上台唱餐飽。晚宴仲有「猜啞謎」遊戲，廠商會立法會代表林大輝被捉上台指手畫腳，叫人估啞謎，相當搞笑。青委們咁團結，Irons大叫欣慰，佢自爆當年入廠商會時直接加入做會董，未嘗做青委滋味，期待將來有一位青委主席可以接棒做會長喎。
風災肆虐紐約，咁啱Irons兩個囝囝都喺美國讀書，幸好大仔喺波士頓，二仔就住喺離開紐約市三小時車程嘅地方，所以安然無恙，但細仔學校因風災放多三日假。
卓妮