嘩嘩嘩！政府有筍工，唔怕褲穿窿，呢鋪真係二趾長過公，唔使一世窮！
有一個新紮政治助理喎，小生有禮行年二十有六咋，已經扶搖直上成為政壇新貴。二十六歲乳臭未乾就榮升教育局政治助理，月（手豆）九萬八千幾銀簡直天降橫財，真係唔知應該讚佢年少有為好吖，定係話佢水鬼升城隍浪費公帑。你知啦，副局政助出晒名係「隱形特種部隊」，市民對佢哋嘅認知率接近零，是否物有所值確係一個大問號。
特區政府尋日公布新一批副局長以及政治助理嘅名單，具體邊個打邊個唔講嘞，大家有興趣就揭去新聞版面研究一下，話唔定得到靈感有助大家日後躋身官場飛黃騰達。功夫茶今日主要同大家討論一個課題，用人唯才到底係乜嘢意思呢？
即係咁，委任副局政助由第一日開始已經問題多多，情況由前朝曾蔭權政府延續到當今梁朝。貪曾唔知幾時開始患上腦殘反智症候群，開設筍工職位之時竟然不設國籍審查，任由手持外國護照嘅「八國聯軍」出任副局政助，搞到滿城風雨之後，個個認祖歸宗放棄外國護照先至收科。至於市民對佢哋嘅認知率接近零，情況似乎到家陣都冇乜改善。
好嘞，睇番梁振英政府上台以來嘅用人紀錄，大家可能有一個感想，點解餐餐都係所託非人o架？原本嗰個發展局局長麥齊光，上台短短日子未坐暖張櫈啫，竟然被揭發係一個涉嫌詐騙租津嘅不法之徒，火速落台淪為史上最短命局長不特止，更加要接受廉署調查，跟手被送上法庭起訴。膽粗粗赤膊上陣嘅新任發展局局長陳茂波，先係捲入劏房風波，然後涉嫌酒後駕駛，比麥齊光略勝一籌嘅係佢尚未因為醜聞纏身而落台。
功夫茶想問一問梁特首，所謂選賢與能有冇品格審查o架？既然起用正印局長都甩頭甩髻，起用局長副手會唔會更加甩皮甩骨？嗱嗱嗱，咪住先，行政會議成員雖然唔算問責官員，不過身份都好顯赫，而且又係特首左揀右揀嘅揀蟀對象，家陣行會成員林奮強被質疑偷步賣樓，會唔會又係所託非人呀？
或者咁講啦，強將手下無弱兵，弱將手下無強兵。新一份副局政助名單公布之後，功夫茶真係擔心，唔知幾時再會爆大鑊。如果要避過弱將手下無強兵嘅悲劇命運，無他嘅，男兒當自強囉，一旦弱勢政府變番強勢領導，咁就一天都光晒。
用人唯才云乎哉，首要條件係唔好起用心術不正嘅鬼靈精。好似麥齊光嗰一種精甩辮嘅官場老油條，仲有前朝貪曾拍住上嘅政務司司長許仕仁，用多幾個隨時搞到廉潔奉公嘅核心價值萬劫不復呀！