政情：鍾樹根fb錯漏百出 唔怕冇「面」
民建聯立法會議員鍾樹根早前被我哋獨家發現佢張卡片錯漏百出後，睇嚟佢並無認真檢討，前兩日再畀人發現佢一日內喺社交網站facebook（fb）出錯三次，包括自稱係「主法會」工作、又連結咗去澳門立法會，之後又話自己係「立法會議員」內做議員。樹根尋日就為此事賴三賴四，仲聲言唔會被網民嚇窒而唔玩fb，但以後會與同事檢查多次先將貼文放上網。
樹根解釋話，其實fb嘅資料已經錯咗好耐，佢當選立法會議員後已將工作一欄填「立法會議員」，但就唔小心打咗「主法會」，之後改正打番「立法會」，點知就自動超連結去澳門喎。
被改花名「Tree根」
佢仲話，只係依家作為議員先至多人留意咗：「開頭都冇人理o架，依家市民監察都係啱嘅！」至於有網民幫佢改花名做「Tree根」，佢就話當二次創作搞吓笑喎。