剛過去嘅九月立法會選舉，泛民多個政黨嘅議席數目下跌，大傷元氣下自然想韜光養晦，請願示威次數亦頓時大減，就喺呢個真空期，新社聯原來正靜靜起革命，最近幾乎逢周三都會動員到立法會示威搶佔曝光率。
有新社聯中人話，要每周一示威認真唔容易，原先佢哋都擔心未必有足夠議題主打，但諗諗吓其實每周都有社會熱議議題，加上由區議員發掘林林總總嘅地區議題，此舉一來令有新社聯背景嘅議員無因進身立會而脫離地區民情，二來亦可定期測試動員能力。話口未完，尋日佢哋就去咗政府總部，要求政府完善港鐵可加可減機制，睇嚟佢哋唔係講吓咁簡單。