由七位工商界同專業界別議員組成嘅經濟民生聯盟（經民聯），成立後終於有搞作。主席梁君彥尋日公布各政策範疇嘅發言人，但估唔到司法發言人呢個位，竟然唔係由司法及法律事務委員會主席梁美芬（梁博士）擔任，而係搵咗地產及建造界議員石禮謙（大舊石）做。睇嚟唔止建制派，就連經民聯內部都唔想梁博士掂啲司法嘢喎。
不過，梁君彥話千祈唔好睇小大舊石，因為佢依家喺城市大學攻讀緊法學博士，絕對有資格講司法議題喎。如果冇記錯嘅話，梁博士喺城大有份教法律，唔通石禮謙係佢入室弟子？但梁博士就點都唔肯講有冇教過大舊石。
冇得做司法發言人，咁梁博士負責乜嘢呢？經民聯就安排咗佢做食物安全、環境衞生政策發言人，簡單啲講，即係繼續叫佢捉老鼠囉，開正佢個瓣。另外，睇番份政策發言人名單，原來副主席林健鋒完全冇影，梁君彥話，林健鋒做咗行會成員後，意見只能夠代表自己同行會，費時佢亂講嘢影響經民聯立場喎。