政情：建制派呻信錯「人」
前日立法會財務委員會因為未夠時間進行表決，搞到四十萬長者少攞一個月津貼，財委會主席張宇人（Tommy）嘅主持會議手法因而備受批評，據聞無論建制派同政府都有微言，覺得Tommy矯枉過正，議員發言超時又冇及時煞停，去到第二輪發言時又唔識收緊發言時間。好多建制派議員都批評，係Tommy一手搞到唔夠時間表決，真係後悔揀佢做財委會主席喎。
我哋之前講過，建制派最初屬意金融界議員吳亮星做財委會主席，因為佢以前做過財委會副主席，又夠江湖地位。不過，後來自由黨又話想做，建制派睇在該黨有五席份上，最後協商出張宇人同吳亮星一人做一屆主席。建制派甘心支持Tommy做主席，目的都係唔希望佢好似上屆主席劉慧卿咁，經常容忍議員拉布都當睇唔到。但偏偏選咗Tommy後，竟然變成另一個卿姐，不停容許議員無限次發言，完全無視議會進度。
拒縮減發言時間
其實民建聯喺前晚財委會已感覺到唔對路，所以一休息就捉住Tommy密斟，要求佢開通宵會、縮短議員發言時間等。但點知Tommy懶理，話有議員反對就唔可以開通宵，又話有「先例」試過係經過幾輪發言後先至會縮減發言時間，一般嚟講係唔會貿貿然縮減發言時間喎。班建制派對此好不滿，事關Tommy上屆都係泛民主派「拉布」下嘅受害者，點解一做主席就容許「拉布」呢？
被轟執着阻進度
民建聯葉國謙忍唔住發炮，批評Tommy主持會議嘅手法大有改善空間，如果過咗第一輪發言，就可以收緊至每人發言三分鐘，仲話Tommy如果太執着規矩，只會阻礙議會進度，有負建制派期望。佢會喺明日財委會上提出「剪布」動議，點知Tommy又以無先例為由，諗住喺有關動議前加插辯論，等大家討論吓係咪可以用呢個形式去修改議事規則喎。阿謙話，如果Tommy真係咁做，佢會提出中止待續動議，一下子跳去討論「剪布」動議，睇嚟佢哋兩個將會上演一場大鬥法。