中環出更：梁寶珠搞萬人合唱《帝女花》
熱愛粵劇嘅保良局主席梁寶珠，籌款都離不開粵曲，適逢已故粵劇名伶任劍輝嘅百歲冥壽，佢將會喺嚟緊十日晚於紅磡體育館搞個「萬人齊唱帝女花任白夜」，屆時會號召萬人齊唱大家耳熟能詳嘅《帝女花之香夭》，咁大陣仗，希望籌得可觀善款外，相信當晚萬人齊唱粵曲嘅壯觀場面或會打入健力士紀錄。
寶珠姐話，《帝女花》唱到街知巷聞，三歲至八十歲都識唱，今次喺紅館開騷，街坊最少捐一張「紅衫魚」買飛入場，就可以唱埋一份。當晚十多位粵劇大老倌都會鼎力支持，而八和會館主席汪明荃亦會捧場。咁熱鬧，難怪逾萬個座位門券，已賣得七七八八。籌到嘅錢，將會用作成立「保良局粵劇發展基金」，培育新一代人才。
粉墨登場唱《去國歸降》
當晚寶珠姐仲會粉墨登場，唱番首《去國歸降》。可惜近日忙到飲水都無時間，惟有趁沖涼練吓歌，又把握坐車時間，叫司機開大音樂畀佢聽熟首曲。
問到養聲秘訣，佢話最緊要係表演前幾日講少啲嘢，把聲自然靚爆喎。