中環出更：工業家打高球劉燊濤贏姚明

匯聚工業家第二代接班人嘅工業總會青年委員會，話咁快已成立一周年，青委主席孫榮聰（Eric）、副主席劉燊濤（Gary）等一班年輕人，日前喺工總總部舉行慶祝酒會，Eric嘅爸爸兼前工總主席孫啟烈、Gary爸爸工總副主席劉展灝等的父輩都去支持。劉展灝一見到卓妮就報喜話，Gary啱啱贏得海口觀瀾湖高爾夫球明星賽冠軍，連籃球巨人姚明都唔夠佢打呀！
鍾志平（中）與青委副主席兼德國寶千金陳嘉賢（右三）等女將舉杯歡慶。右一為顏明秀。（余素月攝）
鍾志平（中）與青委副主席兼德國寶千金陳嘉賢（右三）等女將舉杯歡慶。右一為顏明秀。（余素月攝）

Gary話，早前佢應鐘錶品牌邀請到海口，獲大會安排與職業球手Darren Clark、知名導演何平同一組，迎戰共有三十六隊參賽嘅職業業餘及明星配對賽，結果佢哋勇奪冠軍，連姚明都成為手下敗將。Gary笑稱，佢籃球打唔過姚明，但係講到打高球，姚明就唔夠佢打喇！

原來Gary六歲就開始學打高球，十二歲正式落場打十八洞，個人創下最佳成績係八十二桿，當時大約廿三、四歲。佢話依家忙到冇時間練波，最多一個月打一次，謙稱球技由六歲之後都冇進步過。吓？咁即係六歲時已有今日水準，豈不是神童？

孫榮聰（右一）凝聚工業界新星力量，劉展灝（左三）大仔劉燊濤（左二）及細仔Ronald（左一），工總副主席鄭文聰（右三）及囡囡鄭凱茵（右二）齊支持。
  • 孫榮聰（右一）凝聚工業界新星力量，劉展灝（左三）大仔劉燊濤（左二）及細仔Ronald（左一），工總副主席鄭文聰（右三）及囡囡鄭凱茵（右二）齊支持。
劉燊濤（右）與職業高球手Darren Clark合力打敗姚明。（受訪者提供）
  • 劉燊濤（右）與職業高球手Darren Clark合力打敗姚明。（受訪者提供）

鍾志平勉接班人腳踏實地

Eric就話，經過一年嘅努力，青委成員已由成立初期五十人，增長至逾一百人，自認成績唔錯，希望未來一年再錄得增長就好喇！工總主席鍾志平都現身支持，仲叮嚀呢班工業界接班人，唔好學外邊啲人「炒炒吓」，要腳踏實地做好實業。以服務業掛帥嘅香港，成日話經濟要轉型，工業界呢班未來主人翁，認真責任重大。

卓妮

第一手消息請下載on.cc東方互動iPhone/iPad/Android/Windows Phone Apps