開講有話，弱勢政府百事哀，真係冇講錯o架。當局推出長者生活津貼，原意係幫助有需要嘅老人家，有人稱之為德政添，點知好事多磨，「德政」竟然被立法會一招中止待續所阻，唔知幾時至可以通過撥款，四十萬合資格長者望天打卦，隨時見財化水，你話係咪無辜吖！你話政府係咪百事哀吖！
喺香港，行政及立法關係一向惡劣，乜都鬥餐飽，大家早就見怪不怪，奇就奇在連幫助老人家嘅惠民措施都受到阻撓，長者利益成為雙方鬥法嘅籌碼，簡直匪夷所思。話就話資產申報制度係爭拗焦點，有議員要求豁免申報，有議員要求提高資產上限，而政府就一於企硬，堅持「三不」，不取消資產限額、不調整資產上限、不撤回方案，雙方雞同鴨講，卒之搞成咁。不過正如有人話齋，成件事未必咁簡單，部分政客利用資產申報大做文章，千方百計阻撓撥款，其實主要係想令政府難堪，講得白啲，即係令政府寸步難行，就算係德政，一樣唔放過。
咁講唔係冇根據o架，政務司司長林鄭月娥自己都話，如果政府今次屈服，相信好多人都會對政府失望。嗱嗱嗱，部分政客嘅目的咪就係打擊政府威望，令市民失望囉。唔怪得行政會議召集人林煥光形容反對撥款嘅議員係「黑暗勢力」。講真吖，政客無良，政府無能，搞到成個香港烏煙瘴氣，七國咁亂，的確係幾黑暗o架。
即係咁，政府聲稱推出長津嘅目的係幫助有需要長者，係扶貧，唔係敬老，亦唔可以同全民退休保障混為一談，所以有需要引入資產申報制度。老實講，好鋼用在刀刃上，資源有限，需求無限，長津用嚟幫助最有需要嘅老人家，係無可厚非嘅，問題係，政府明知有咁多議員反對資產申報，連唔少建制派議員亦反戈一擊，喺咁嘅情況下，係咪應該靈活變通，調整戰略呢？例如適當提高資產上限，令部分反對嘅議員有偈傾，咪唔使搞到咁僵囉。企硬唔係唔好，但有時都要睇形勢，死牛一邊頸，通常撞板多過食飯o架！
無論點都好，老吾老以及人之老，盡快通過撥款，令四十萬合資格老人家可以早日領取長津，唔使望天打卦，係社會嘅共識，政府又好，政客又好，都唔好再玩嘢喇。講開又講，長津撥款一拖再拖，但議員瘋狂加薪就即時落實，殘民自肥，損人利己，都好唔公平啫。嗱，咪話功夫茶唔提醒，過得自己都要過得人，市民嘅忍耐力有限嘅咋，政客逆民意而行，盞唔衰攞嚟衰！