特首梁振英上任前揚言「穩中求變，適度有為」，如今上任百日已過，依然面對「萬箭穿心」之殘局，「百日維新」連一秒都未出現過，市民但見「百日圍城」，香港成躁暴之城，鬼咩，一項項公共政策的爭議，即使是惠民紓困嘅措施，無不瞬間演變成一次次反政府嘅群眾運動！推出一項，跪低一項，令人為香港明天擔憂！
近日，眼見樓市如脫線紙鳶，一路飆升，CY雖然知道房屋問題係施政嘅「重中之重」，無奈講多做少，「虛招」頻發，如果以為佢上台之後樓市可應聲下降，咁就中晒招，用家欲哭無淚，心中唔怨恨就勢係假！眼前「樓瘋」升幅勢不可擋，無論凶宅、舊區、沙漠之地……都升到令人眼前一亮，要言之，沒有最高，只有更高！
「樓瘋」癲成咁，一眾高官如曾俊華、陳家強、陳茂波、張炳良紛紛高調出來「發言」，有理冇理，講清未必講楚，都話有「必要」會再出招，又話要盡快搵多啲地起公屋，講吓冇壞，雖然「搵地」舉步維艱，都要扮吓太空人——在月球上的一小步，是人類的一大步！各位，政府辣招壓樓市，沙塵滾滾，但願唔會一法立一弊生，搞到業主更加惜售，二手樓不跌反升，苦了真正用家。
總之，一眾高官齊齊亮相話要壓抑樓市升勢，得唔得係另一回事，起碼大家睇到政府係做緊嘢，係「急市民所急」，一眾高官就算唔係「老吾老以及人之老」，都不至於「袖手乾坤看日斜」，各位等「上車」及打救嘅棺材床位一族！畀啲時間及信心新政府喇！