政情：張文光「黨鞭」上身批新丁
民主黨張文光任立法會議員時可以話係金句王，同佢講起黨友黃碧雲喺議會內嘅表現，佢就好似「黨鞭」上身咁，話黃碧雲同接替佢做教育界功能界別議員嘅葉建源，雖然手氣好抽到提質詢同動議辯論，但就「捉到鹿都唔識脫角」，錯過對官員進行反擊嘅機會喎。
喺立法會打滾多年嘅張文光話，黃碧雲同葉建源兩位新丁手氣好，但係辯論技巧就有待磨練，不過，佢話兩人已經好過自己好多，事關佢第一次開會時直情驚到心跳加速，仲連點投票都要人教喎。
至於因病棄選教育界嘅教協會長馮偉華就暗踩民建聯蔣麗芸講嘢得把聲冇內涵，「蔣麗芸勇啲，好大聲講嘢，不過唔係做騷。」另外，教協將軍澳中心尋日開幕，作為教協副會長嘅張文光就話呢間中心主要用作開辦課程，唔同其他兩間有嘢賣，佢話費事又做到好似超級市場咁，畀隔籬嘅商場投訴。