政情：「前輩」李家祥唔識郭榮鏗
新一屆立法會七十名議員有近半數係新丁，現階段認識唔晒都唔出奇，好似新任法律援助服務局主席李家祥（Eric），尋日出席活動遇到法律界議員郭榮鏗（Dennis）時，即時主動同佢攀談並交換聯絡方法。Eric事後承認，自己唔係好認識Dennis，又笑言或者同自己年紀大對方好多有關喎，認真風趣。
對於獲委任做法援局主席，曾多次出任政府公職嘅Eric謙稱，唔敢話自己駕輕就熟，但曾經係「空降部隊」做過唔同工作，但無論如何，佢都會以獨立身份聽意見，唔會偏向任何一方喎！
講番尋日舉行嘅律師會法律周活動，律師會宣布成立法律周二○一二熱線，主要涵蓋人身傷亡、家事法、中小企法律問題等四個範疇，由該會逾百名義務律師為市民提供約一小時免費法律諮詢服務，為期三個月。據聞律師會都好重視呢個活動，準備用近百萬元作宣傳，究竟呢招一擲千金係咪使得，三個月後自有分曉。