政情：教局副秘陪仔中大攞料
面對十年教育改革，早前不少高官先後被發現送子女去海外升學，但教育局副秘書長李美嫦就以身作則「力撐」本地教育。李美嫦個仔喺本地學校讀書，今屆仲要同其他公開試考生一齊爭入大學，所以尋日特登陪囝囝去中文大學攞料。不過，當被問到佢個仔係咪應屆香港中學文憑試考生，李美嫦即有所迴避，只重申「佢係喺本地學校讀書」，莫非佢個仔唔係考本地嘅文憑試？
喺教育局專門負責延續及高等教育科嘅李美嫦，尋日朝早一身便服現身中大校園，仲去參加中大入學資訊日嘅本科入學講座，但今次唔係為公事，而係為阿仔嘅前途。李美嫦見到記者都嚇一跳，猛話自己係以一般市民身份陪個仔去聽講座。但佢只認阿仔係今屆入大學，至於係透過乜嘢公開考試入大學呢？係咪應屆文憑試考生？佢就避而不談，只重複話阿仔係喺本地學校讀書。
李美嫦透露，阿仔想讀工程學系，但係咪想入中大呢？佢就即刻教育局高官上身，好官腔話：「我哋要探索本地和海外嘅多元出路。」即係唔排除去海外升學啦！