政情：廖長江唔認烏龍投錯票
立法會係一個經常出現「驚喜」嘅地方，好似前日工聯會喺財務委員會提出中止待續動議，要求將長者生活津貼計劃撥款押後表決，結果工聯會同泛民主派合作下通過動議。不過，最令人意外係新早餐派嘅中總代表廖長江（Martin），事前明明話支持政府，但投票時竟然支持工聯會嘅動議。有政界人士猜測，Martin作為立法會新人，斷估唔會咁勇，估計佢係緊張得滯投錯票。
我哋尋日遇到Martin，當然捉住佢問清楚啦。佢話自己絕對冇投錯票，雖然早已表態支持政府，但唔代表政府可以唔聽團體意見，加上嚟緊周一仲有公聽會，如果就咁表決咗，似乎有欠程序公義，所以寧願押後表決，都要維護立法會尊嚴喎。佢仲話，現時仍然傾向支持政府，但首要條件係聽晒團體嘅意見先。
同樣係新早餐派嘅金融界議員吳亮星（星爺）就話，佢哋只就長者生活津貼傾過投票立場，但冇特別提到中止待續動議點投票。不過，星爺話唔緊要喎，因為Martin今次投票取態，反映到新早餐派真係冇綑綁投票，大家可以自由投票，並非盲目護航。