政情：貪曾逍遙 遺臣四散
「貪曾」曾蔭權貪盡海陸空令全城怒吼，早前避走外地不特止，甚至跟富豪到浙江遊玩都被網民評頭品足一番，可見佢已經到達神憎鬼厭地步。不過，自從貪曾卸任撤離禮賓府及政府總部後，兩個地方嘅環境都清新咗，不再臭氣熏天，咁啱得咁蹺，佢昔日身邊嘅遺臣，都陸續被調離視為權力核心嘅特首辦，甚至同添馬艦門常開講再見，目前就只剩下前特首辦特別助理陳岳鵬（Ronald），因為過檔政制及內地事務局做政治助理先至可以留低。
先講貪曾以前嘅「大內總管」、前特首辦主任梁卓偉，雖然佢為官多年都口碑唔錯，點知最後都係選擇離開官場，返回港大教書同做研究。至於負責批准貪曾入住超豪總統套房嘅前特首私人秘書甯漢豪，佢早前被調職出任地政總署署長，話口未完就有大樹倒冧壓毀貨車並造成傷亡，要佢親自現身解畫，認真黑仔。另外已調離門常開嘅仲有前特首辦常任秘書長麥靖宇及前特首辦助理處長（傳媒）何小萍二人，前者則調任工貿署署長，後者則出任油尖旺民政事務專員。
陳岳鵬轉職有得留低
目前門常開就只剩下Ronald，由特首辦特別助理轉做政制及內地事務局做政治助理，而且仲有人工加添。不過，佢都唔係順利過渡新政府，而係先返回娘家新民黨「過冷河」，幫「主人」葉劉淑儀助選立法會後，最近先至獲邀返回新政府。據聞係多得局長譚志源賞識佢，否則要佢再返回地區「揼石仔」選區議員，確係兩頭唔到岸，況且當初佢為入政府而中途辭任南區區議員，被離棄嘅選民又係咪輕易接受番佢呢？
貪曾今年初被本報獨家踢爆「貪盡海陸空」同「貪盡省港澳」，之後有傳有關方面禁止佢喺九月立法會選舉前返港「搞風搞雨」。不過，貪曾最近又靜極思動，最近除咗跟富豪上浙江考察外，重陽節翌日就約埋一班「曾朋友」食飯，唔知佢四出遊玩嘅同時，有冇一刻想起班舊夥計嘅死活呢？