中環出更：衞奕信攜妻行山健步如飛
人民力量立法會議員陳偉業前晚喺金鐘巧遇久違了嘅前港督衞奕信（David Wilson），咁啱得咁蹺，卓妮尋日早上十一點鐘竟然又喺淺水灣道遇到衞奕信同太太Natasha Helen Mary去行山，隨行仲有幾位保安人員，一共六人浩浩蕩蕩上山去。衞奕信係行山遠足嘅愛好者，香港近期天氣稍為轉涼，去郊野行山確係一流。雖然佢已經年過七旬，但係行起山嚟依然健步如飛，真係老而彌堅。
卓妮見衞奕信着住件紅色polo恤、黑色運動褲同行山鞋，顯得精神奕奕，而佢太太亦係一身悠閒裝束，一睇就知去行山郊遊。不過，衞奕信今次就唔係行以佢自己命名嘅衞奕信徑，而係沿連接衞奕信徑嘅紫羅蘭山徑行去淺水灣坳，沿途遠眺港島南區風景，唔知佢會否有特別感受呢？雖然佢已經一頭白髮，但係行咗成半個鐘、又上又落一啲都冇喘氣，仲要氣定神閒咁叉腰擺甫士畀卓妮影相，真係犀利。
返咗嚟「胡廳」
雖然衞奕信曾經貴為港督，但一啲架子都冇，仲話畀卓妮知，佢今次返嚟香港純粹係當旅行周圍行吓。卓妮就問佢返咗嚟幾多日啦，點知佢就用普通話回答：「五天」，認真生鬼。
卓妮