中環出更：梁錦松全家撐小母牛
尋日下午三點鐘，銅鑼灣維園充滿嘉年華氣氛，事關國際小母牛香港分會舉辦十人十一足慈善障礙賽，出賽隊伍爭相扮嘢增添歡樂氣氛。小母牛主席梁錦松及身兼愛心大使嘅太太伏明霞拍拖現身，仲趁周末帶埋三個仔女一齊去玩，一家五口幸福滿瀉。
連續幾年帶大女梁司渝到內地探訪嘅伏明霞話，囡囡探訪時見到貧困嘅同齡小朋友，感受特別深，佢認為係好好嘅教育機會。咁幾時輪到大仔皓嘉去探訪？
爸爸梁錦松就話，囝囝年紀仲細，大仔七歲，細仔家瑋四歲，驚佢哋去到衞生條件欠佳嘅山區容易患病，所以都係遲啲先喇！
杜振源帶客戶見識善事
身兼籌款委員會主席嘅「快勞夾大王」杜振源（Simon）一早就到場，佢話全球經濟持續下滑，籌款難度倍增，惟有諗計開拓財路，其中一條好橋係借助自己生意網絡，向全球客戶發信籌款，結果反應唔錯，認真有腦。Simon講到興起，仲即時介紹身邊兩位來自荷蘭嘅男士畀卓妮識，佢哋係Simon公司嘅荷蘭代理商，專程來港公幹，於是趁機去維園見識香港樂善好施嘅一面，仲話明年考慮跟大隊去內地探訪農戶！
今年啱啱加入小母牛大家庭嘅百利建集團董事總經理陳正欣（Daniel）都有到場，佢特登自掏腰包請十名內地員工來港參加障礙賽。Daniel話，內地對慈善事業嘅意識薄弱，所以特意畀佢哋睇吓香港如何舉辦慈善活動，順便加強中港員工嘅交流。
卓妮