前人耕耘，後人收穫，對照今日嘅官場生態，呢句話應該改為，前朝種禍，後人收鑊，即係接收黑鑊咁解。
乜嘢黑鑊呢？多咯，國民教育、放寬個人遊、新界東北發展計劃、龍尾灘人工沙灘……可謂鑊鑊新鮮鑊鑊甘。而即將殺埋身嘅政策黑鑊就係：擴建堆填區！
嗱嗱嗱，將擴建堆填區形容為黑鑊，唔係功夫茶屈前朝政府o架，係當朝環境局副局長陸恭蕙自己講嘅。當局打算重推擴建堆填區計劃，陸恭蕙身為環保政策第二把手，梗係走唔甩啦，又視察將軍澳堆填區，又會見當區居民，指固體廢物問題迫在眉睫，擴建三個堆填區嘅計劃難以擱置喎。佢講到肉緊之時，仲話擴建堆填區問題可以理解為一隻「鑊」添，但政府仍然會接手呢隻鑊咁話。
唉，照咁講，即係當局都知道擴建堆填區爭議極大，邊個負責隨時都要孭鑊啦；即係當局都知再次闖關阻力重重，隨時觸礁啦。你話幾大鑊吖？係人都知，香港有四多，人多車多廢官多廢物多，固體廢物堆積如山，堆填區遲早逼爆，如果呢個死結解唔到，環保官僚孭鑊事小，垃圾問題爆大鑊事大吖！
咁講啦，孭鑊係廢物官員嘅慣常動作，香港人都見慣見熟嘞。呢，前任環境局局長邱騰華當日硬推擴建堆填區一敗塗地，搞到香港有垃圾爆滿之患，已經孭咗隻超級黑鑊啦。家陣嘅問題係，就算再多一名環保官僚孭鑊，都解決唔到問題嘅啫，香港人唔通以後要住垃圾崗咩？
更大鑊嘅係，就算今次僥倖成功擴建堆填區，亦唔代表垃圾問題安枕無憂喎。堆填區總有填滿一日，擴建後幾年再爆滿，到時又點算呢？唔通又擴建，又孭鑊，直至將全個香港變成堆填區，直至孭鑊官僚全部消失晒為止？
所以話啫，最實際辦法都係興建焚化爐。無錯，前朝政府嘅一百五十億元焚化爐大計由於思慮不周，諮詢不足，已被立法會扑低咗，亦遭司法覆核挑戰，但係正如特首梁振英話齋，要「適度有為，穩中求變」吖嘛，如果環保官僚真係有為，真係求變，不妨快快諗計改進方案，只要選址遠離民居，兼夾保證唔會造成污染，市民未必會強烈反對喎。
其實，以今時今日嘅科技水平，焚化廢物唔止可以做到冇污染，仲可以再生能源添，一舉多得，總好過擴建堆填區阻力重重，一戰多鑊啩。嗱，邱騰華上屆臨收工前咪以考察焚化設施之名展開歐遊之旅嘅，家陣當局再諗焚化爐計劃，咪當幫吓邱騰華囉，唔使佢成世孭住個浪費公帑罪名吖嘛。
講到尾，堆填又好，焚化又好，總之環保官僚醒醒定定，唔好將香港變成垃圾港。如果唔係，你哋嘅下場唔止孭鑊，仲要落鑊，被市民插爆吖！