環境局副局長陸恭蕙尋日視察將軍澳堆填區，除咗遇到有人請願要求擱置堆填區擴建計劃外，其後佢去到社區會堂同居民會面時，亦被居民斥責當局土地規劃不當，導致居民每日飽受「聞臭味」之苦。面對群情洶湧，陸恭蕙就試圖降溫，話自己都係不幸接咗上屆政府遺留下嘅呢隻鑊，但今屆政府仍會處理，又指過去嘅環保工作確有不足之處，希望任內努力改善喎。佢咁講法，莫非暗批前局長邱騰華辦事不力，卸咗隻鑊畀佢孭？
